سپوږمۍ،كابل: د افغانستان دولتي خبري اژانس (باختر) ويلي چې  ايران به دمزارشريف ، کندهار او جلال اباد په ښارونوکې دښوونځيو د جوړولو لپاره ددېرشو ميلونو امريکايي ډالرو مرسته وکړي.

سرچينه وايي چې دغه ټکي په هغې کتنه کې څرگندشوي چې پرون  له غرمې وروسته دافغانستان دبهرنيو چارو وزارت دسرپرست ډاکتر رنگين دادفر سپنتا اودايران دبهرنيو چارو وزارت دمالي اواداري مرستيال فرحي ترمنځ وشوه .

دبهرنيو چارو وزارت داطلاعاتواوخپرونو مديريت ويلي چې په دې کتنه کې ډاکترسپنتا په تيرو کلونو کې دافغانستان دبيا جوړولو په لاره کې دايران دمرستواودافغانو مهاجرينودکوربه توب له امله دمننې په ترڅ کې ددواړو مسلمانو وروڼوهېوادونو ترمنځ اړيکي دوستانه وبللې او ويې ويل، چې افغانستان اوايران لرغوني ديني اوفرهنگي پيوندونه لري .

 دغه راز فرحي ويلي، ددواړو اسلامي هيوادونو ترمنځ ددوستانه اړيکو په پام کې نيولو سره دايران داسلامي جمهوريت مقام يوفرمان صادركړى چې دهغه له مخې په ايران کې ميشت مهاجرافغانان کولاى شي ددغه هېواد په پوهنتونونو کې لوړې زده کړي وکړي.

ديادونې وړ ده چې ډاکترسپنتا په دې کتنه کې دلندن دکنفرانس اودهغو سيمه ييزو کنفرانسونو په اړوند چې ټاکل شوې، دافغانستان په باب به جوړشي ، معلومات ورکړل.

هېره دې نه وي، چې په دې وروستيو كې په ايران كې د افغانو كډوالو حالت يو ځل بيا د اندېښنې وړ ګرځېدلى دى.